فلسطين - البوابة 24
أعلنت الفنانة المصرية زيزى عادل، اعتزالها مهنة الغناء بعد أن فكرت كثيرًا قفي الأمر، وحصلت على دعم وتشجيع بعض الأشخاص القريبة منها، حيث شاركت مقطع فيديو عبر حسابها الشخصي بموقع تبادل الصور والفيديوهات "إنستجرام"، وقالت خلاله: "أنا النهاردة طالعة أقول خبر مهم أخدته في حياتي وهو قرار اعتزالى".
وتابعت زيزي: "قررت ترك مهنة الغناء، والقرار أنا مخدتهوش امبارح أنا وخداه من فترة كبيرة جدا، بس يمكن مطلعتش قلت وقتها لأني كنت حابة أتكلم مع نفسى ومع الناس القريبة أوى".
وأضافت زيزي: "معظم الناس القريبة منى عارفين نفسهم ولما قلتلهم على القرار شجعونى ودعمونى كمان، ويمكن قرار الاعتزال ده بيبعدنى عن أكتر مغريات الحياة وهى الشهرة والأضواء".
سبب اعتزالها الفن
وكشفت زيزي عن سبب قرارها باعتزال الغناء قائلةً: "أنا ببعد عن الفن عشان بقرب من ربنا، والفترة اللى فاتت قربت من ربنا جدًا، ولقيت ان القرآن بيقولى إنى لازم أكون ست ملتزمة، وبحاول على قد ما بقدر أكون ملتزمة وهتستغربوا شوية انى طالعة بشعري ومش محجبة، ويمكن ده لأني لسه ربنا لم ينعم عليا بالحجاب، وبدعي ربنا يتممها عليا، وكل حاجة بتيجي خطوة خطوة ومفيش حاجة بتيجي مرة واحدة".
وأوضحت زيزي أن الفن يعتبر مصدر دخلها، فائلةً: "أنا عاوزة أقول كمان الفن هو مصدر دخلي ورزقي، وأنا بسيب حاجة بعيش منها وسيبتها وعارفة إن ربنا هيرزقني، وأنا راضية جدا عن قراري ومبسوطة جدا بيه وحابة اللى جاي جدا وحاسة إن حياتي اختلفت تماما".
واستطردت: "يمكن لما أخدت القرار اتعرضت لمواقف تسمى اختبار من ربنا وكان اختبار صعب والإنسان ضعيف، لأن جالي عرض مجاليش وأنا بمارس مهنة الغناء، ولكن الحمد لله ربنا كرمنا وقدرت ارفض من دعم من ناس حواليا".
وقالت زيزي: "أنا مش عاوزة أدخل في حتة إن الفن حلال والفن حرام، عشان مبقاش طالعة إني داعية أنا طالعة بتكلم عن نفسي، وإنى بطلت أغني وديني بيقولي كده وكل واحد حر في حياته".
واختتمت مقطع الفيديو بقولها: "أنا حابة أموت وربنا راضي عني ويمكن دى حاجة كلنا بنتمناها، فأنا مش عارفة هاموت امتى ولكن كل اللى عوزاه أكون مستعدة لمقابلة ربنا وأقابله وأنا راضية عن نفسي وحياتي وأفعالي، والحمد لله ربنا كرمني والتزمت، وربنا يكرم التزم اكتر وادعولي ان ربنا يثبتني على اللي انا فيه".
