فلسطين - البوابة 24
شارك مؤسس صفحة "أطفال مفقودة" رامي الجبالي، على صفحته الخاصة بموقع التواصل الاجتماعي "فيسبوك"، تفاصيل واقعة إنسانية مؤلمة حيث عقامت سيدة حامل بعرض جنينها للبيع قبل 4 أيام فقط من ولادته لصاحب المبلغ الأكبر.
وكتب الجبالي في منشوره: "٥ أيام مش بنام و شغل ليل ونهار وخلية نحل في أطفال مفقودة شغاله عشان ننقذ الطفل ده من البيع على مواقع التواصل الاجتماعي."
تفاصيل الواقعة
كشف رامي الجبالي عن تفاصيل الواقعة، قائلاً: "الحكاية ابتدت بمنشور علي فيسبوك فيه طفل في رحم أمه معروض للبيع أول ما يتولد بمقابل مادي ٣٠٠ ألف جنيه واللي بتبيعه أمه شخصيا والتواصل من خلال زوجها وأختها ... وفاضل علي ميعاد الولادة 4 أيام فقط".
تابع رامي: "بدأنا نتواصل معها على إننا المشتري واتفقنا علي تفاصيل الاستلام والتسلم والمستشفي اللي هتولد فيها و توقيت الولادة ... كل ده بالتنسيق مع كل الجهات المختصة في سرية تامه، الرعب كان من انهم يبيعوا الطفل لحد تاني هيدفع اكثر بدون ما يقولوا و فجأه يختفوا .. و الكل حاطط ايده علي قلبه و مش بينام".
وأوضح الجبالي: "امبارح و بفضل الله قدرنا ننقذ الطفل من البيع و ناخده من المستشفي بالليل بعد الولاده بساعات قليله بالتنسيق مع مكتب حماية الطفل في مكتب السيد النائب العام و بتنسيق مع المجلس القومي للطفولة اللي اتحركوا فورا مع أول تليفون بنطلب تدخلهم".
وأضاف رامي: "لبلد كلها لازم تفتخر بأداء مكتب حماية الطفل Egyptian Public Prosecution النيابة العامة المصرية اللي في أقل من ساعة ونص كانوا استخرجوا إذن النيابة وعملوا التنسيق مع الداخلية وقبضوا علي المجرمين في المستشفي وحاليا الطفل في أمان".
واختتم رامي حديثه قائلًا: "وأخيرا ... بشكر المستشار اللي مش هعرف اقول اسمه اللي كان معانا لحظه بلحظه في إجازته و منامش غير لما إطمأن ان الطفل خلاص معانا ... ربنا يكرمك و يحرسك انت و زمايلك".
